鐘錶界女強人Emme黃伊汶尋日出席香港鐘錶展「國際名表薈萃」活動時，即席分享時裝同腕錶嘅配襯潮流。佢話已代理品牌四年，又話：「由乜都冇到建立晒所有嘢，依家亞洲有四十至五十個銷售點，嚟緊品牌會有更多唔同產品推出，唔單止係錶，仲有其他配件。」佢又透露初做生意時，對鐘錶係零認識：「依家好好多，不過就唔會自己設計款式嘞，但都會畀idea去法國公司個邊，會擺更多時間落去呢門生意度。」

黃伊汶話會擺更多時間落去搞鐘錶生意。

問到忙於戰商界係咪唔結婚？Emme話日前有參與姊妹Yumiko鄭希怡嘅婚宴，又話玩得好開心，順便慶祝埋兩個新人嘅生日。咁場內係咪有人食煙講粗口？佢話：我全部都見唔到喎，大家飲緊酒開懷同激昂係好正常，同埋我哋意猶未盡，已經約緊下一次幾時聚會，希望Yumiko快嘅生BB，因為年紀都唔細啦。」佢又話平時會跟圍內啲親朋密友交流管教男朋友嘅心得，但結婚日期仲未定：「盡快啦，睇吓幾時有呢個緣分，所以嗰晚Yumiko個花球個個都唔敢接，係祖兒執到，不過佢都應該冇咁快。」

第一手消息請下載on.cc東網iPhone/iPad/Android/Windows Phone Apps