張建宗
勞工及福利局局長張建宗尋日出席一個助養兒童活動時，除咗感謝一班家長外，仲不忘幽自己一默，話社署畀助養兒童家庭嘅津貼連最低工資都唔夠，大讚班家長肯「捱義氣」。
逢親有家庭領養一個小朋友，社會福利署每月都會向該家庭發放一筆生活費津貼，現時大概每月三千元左右。按照現時生活水平，呢筆錢真係無可能夠使。可能張建宗都知道政府「度縮」，所以尋日抬高家長踩低自己，先猛讚班家長好有愛心助養兒童，因為除咗金錢，時間同精神都要付出。講完一大輪就自嘲，話助養津貼連最低工資都唔夠，直認班家長真係「政府救星」喎。
玩完自嘲，佢都不忘賣廣告，大大聲話如果家長有乜嘢問題，可以隨時打一個電話，仲話呢個電話一定幫到手。正當台下班家長以為係佢透露自己嘅直線電話或手提電話時，原來佢只係講咗社署求助熱線，真係被佢吹脹。
第一手消息請下載on.cc東網
