設計圖片
前天文台台長林超英離開政府後就瞓身環保工作，今年一月一日更獲委為環境保護運動委員會主席，上任九個幾月似乎唔見有乜大動作，不過尋日政府憲報公布，「環境保護運動委員會」由十月一日起改名為「環境運動委員會」。原來黑英一係唔出招，一出招就將委員會改頭換面。「環境保護運動委員會」由一九九○年創立後就用呢個名，點解二十三年後要改呢﹖
黑英一向醉心環保工作，理應唔會忽然放棄，咁今次棄「保護」係為乜呢﹖原來佢哋今次改名已經醞釀多時，知情人話主要係配合委員會近年嘅角色同功能。業內人士話，上世紀九十年代時，香港人對環境保護的觀念仲停留喺要大力宣傳嘅階段，而委員會成立時，保護仲要宣諸於口，但家吓相信冇乜人唔認同保護環境嘅理念，問題只係點樣保護。
而且，依家委員會嘅功能多咗好多，如委員會嘅職權範圍包括向政府就環境問題提建議、協助政府制訂相關政策，甚至促成社區持份者推動環境工作等，今次改名，簡化同更貼切反映委員會嘅功能，連黑英都可以受惠，事關佢以後出席活動時，介紹佢出場唔使咁複雜啦！
第一手消息請下載on.cc東方互動
