SUN奇古怪：SUN潮語：【燶西錫唇】
當大家睇到今期潮語「燶西錫唇」嘅時候有咩猜想呢？又「西」又「錫唇」係咪以為又係同啲桃色活動有關呢？非也。「燶西錫唇」其實同錢銀有關多啲。不過常言道「錢銀女人」，有咁嘅聯想，都無可厚非。言歸正傳，「燶」就係港式粵語所謂窮嘅意思，即係「窮到燶」。「西」字就當然唔係方向，「西」當然係一個粵語粗口字嘅諧音。「燶西」夾埋就即係窮人嘅同義詞。「錫唇」其實係「Section」嘅譯音，即係部門，小組織或「嗰班人」咁解。全句「燶西section」直白啲講，就係「冇錢嗰班」。到底呢個潮語係點嚟？有估計係監房術語，因為監倉床位係分section段數，某個section嘅囚友可能比較莫財，所以就被稱為「燶西section」，不過真相有待查證。
天有不測之風雲，人有旦夕之禍福。人有三衰六旺，月有陰晴圓缺，花無百日紅，人無千日好……寫咁多句呢啲「阿媽係女人」嘅娘炳嘢，唔係呃字數，而係看電視新聞有感。看見曾經叱咤一時嘅政務司司長橋王許仕仁，如今要面對涉嫌貪污嘅聆訊。仲有狡兔死走狗烹嘅夢熊大師，本來係梁粉嘅佢，當年將心比日月，以為前途一片光明，點知畀人當係隱形眼鏡，用完即棄，之後仲要面臨審訊，隨時淪為階下囚。凡此種種，難免令人感覺世事多變。所以，李白話「人生得意須盡歡」係無死錯人。有錢有權有勢，就要好好珍惜。一個唔該一鋪清袋變咗「燶西錫唇」嘅時候先至去懷念舊時風光，咁就無謂。
最近政府扶貧委員會開會，將會為香港訂立貧窮線，到時可能好多人無論願唔願意都會被打成貧窮人士，全部跌入「燶西section」。到時會唔會造成社會分化，同標籤效應就不得而知。不過，就算話喺貧窮線以上，都唔見得好幾多。香港搞到今時今日，全城人只為大地產服務嘅環境，再加上當今政府嘅無能而治，香港本身對比其他周邊地區，遲早變成「燶西section」，一文不值。
