下月六日舉行嘅維港渡海泳報名人數創三年來新高，當中立法會都有六個議員報名參加，不過呢幾位議員早前試水時就有人甩底，亦有人游得太慢達唔到參賽要求，甚至有人跣腳抽筋添！但喺主辦單位公布嘅參賽名單之中，幾位議員亦已榜上無名，唔通主辦單位驚班議員臨場落水唔掂失威，定係佢哋已經打退堂鼓？

報名參賽嘅六位議員包括體育、演藝、文化及出版界馬逢國、會計界梁繼昌、金融界吳亮星（星爺）、紡織及製衣界鍾國斌、勞工界鄧家彪同胡志偉，全部報名參加「唔計名次、志在參與」嘅優悠組。但奇就奇在大會網上公布嘅參賽者名單中冇佢哋名，反而政制及內地事務局政治助理陳岳鵬就上榜。梁繼昌話，佢同鍾國斌試水時輕輕鬆鬆喺三十分鐘游完一千五百米，大家都達標，唔明點解會榜上無名，星爺就因唔小心跣腳而抽筋，搞到游慢咗；鄧家彪就咁啱因為囡囡氣管敏感入咗急症室而冇去試水。胡志偉就話當日因為太緊張而影響表現，搞到慢咗兩分鐘。

今年渡海泳參賽者要由鯉魚門三家村公眾碼頭游去鰂魚涌公園公眾碼頭，全程一千五百米，要喺七十五分鐘內完成，參賽者試水後合格先可以出賽。胡志偉話大會已經安排佢做下水禮嘉賓，佢落咗水就會一路游。原來六位議員被安排去做下水禮嘉賓，唔怪得參賽名單冇佢哋喇！

第一手消息請下載on.cc東方互動iPhone/iPad/Android/Windows Phone Apps