老照片見證歷史 檔案法歲月留白
睇《好報》，你有着數；唔睇《好報》，你就走寶。嗱，如果你錯過尋日最新一期《好報》，真係走寶嘞，事關今期有個「好懷舊」嘅故事，透過一批珍藏照片，將香港百年歲月重現眼前，既珍貴，又新鮮，咁精彩嘅內容，唔睇係咪走寶先？
講起呢批珍貴照片，可算係歷史遺珠，全輯總共七百張，其中四百張更加從未喺香港曝光，真係難得一見o架。好似嗰張最古老嘅港島全景圖咁吖，繪於一八三七年香港開埠之前，疏淡筆觸將香港嘅古樸風貌原汁原味保留落嚟。又好似嗰張西營盤雀仔橋舊照，超過一百七十年歷史，唔止記錄咗昔日海堤嘅面貌，更加見證咗本港首間私立醫院嘅興衰。至於昔日嘅中環街市、油麻地紅磚屋、殖民地港督府、戰前添馬艦、灣仔鵝頸橋……一一見證香港由小漁村變大都會嘅滄桑歲月，今日重溫，確係別有一番風味o架。
講到呢度，太一叮實在感觸良多。一來撫今追昔，望住呢一張張泛黃嘅照片，想到百年香江歲月如歌，香港人以前憑住一份進取精神創造出一篇篇輝煌樂章，今日卻陷於政治泥沼不能自拔，實在令人唏噓不已。二來咯喎，今時唔同往日，香港歷史來到一九九七就斷咗片，好多珍貴資料不保，以後想懷舊一番都未必有機會呀！
太一叮唔係危言聳聽o架，今日有機會重溫香港殖民地時代嘅歷史檔案及珍貴照片，完全係受惠於英國檔案法，回歸前嘅檔案受到保護，歲月痕迹先至冇被湮沒咋。但係回歸之後，港府唔知黐咗邊條筋，到依家都冇檔案法，搞到大量珍貴歷史資料不斷流失。正如學者話齋，呢十幾年香港嘅歷史幾乎一片空白。咁搞法，香港人要懷舊唔通真係要靠集體回憶咩！
香港冇法例保護舊檔案，唔止歷史資料流失，隨時連貪官嘅犯罪證據都被毀滅。呢，前特首曾蔭權爵士被本報踢爆連串貪腐醜聞，唔知係咪心中有鬼，卸任前居然突然銷毀二萬三千多個檔案，特首辦開支記錄全部毀屍滅迹，查無可查。所以話，貪曾在任期間唔肯訂立檔案法，一啲都唔出奇，方便佢銷毀貪腐證據吖嘛，但係本屆政府無理由再執迷不悟啫，吓話？
開講有話，忘記歷史意味着背叛。港產官僚唔好再做數典忘祖嘅不肖子孫嘞，快快訂立檔案法，如果唔係，遲早連你哋都被人丟落歷史垃圾桶嘅咋，叮！
