設計圖片及對白
煙花璀璨，背後其實涉及好多人力物力，好似每年農曆初二賀歲煙花咁，港人視之為開年嘅慶賀，亦早已成本地傳統盛事之一，管理煙花贊助事宜嘅康樂及文化事務署每年都要做唔少嘢，明年賀歲煙花贊助申請尋日截止，就冇任何團體表示意向，即係話到依家為止，冇任何財團或組織有意贊助煙花，康文署署長馮程淑儀又有排頭痕喇！雖然過去都試過咁嘅情況，但今次要揼人心口，難度恐怕唔細！
截止後仍可交表
本來大家以為今年十．一唔放煙花，物以罕為貴，明年農曆年賀歲煙花嘅贊助可能會爭崩頭，點知尋日接受贊助嘅申請期截止，康文署就得個桔，反而查詢嘅單位就好多，點解有人問、冇人贊助呢？有人分析話，由於明年十．一係建國六十五周年，以中國人逢五、十都大事慶祝嘅慣例，估計唔少愛國團體或親中組織都想留番啲「彈藥」，申請贊助明年十．一煙花攞威好過，唔知係咪咁，搞到農曆年賀歲煙花冇人吼。
康文署雖然喺上月已經邀請有興趣機構將申請書交畀煙花審核小組秘書，為明年二月一日晚（即農曆初二）舉行嘅煙花匯演作準備，但尋日下午截止都沒見人交表。康文署話機構查詢完需要時間整理，加上截止後都可以繼續交表，以往經驗顯示，截止日無人交表都唔出奇喎！
據聞，啲團體講起贊助煙花都不乏正面評價，譬如今年賀歲煙花由中華出入口商會（中出）同海南商會夾咗約八百萬贊助，中出會長莊成鑫尋日就話嗰八百萬元贊助得好抵，宣傳價值好高，問到明年會否再贊助，莊會長就話：「返去傾吓先！」
第一手消息請下載on.cc東方互動
