政壇：高永文食品嘉年華掃貨
食物及衞生局局長高永文係人氣高官，尋日為香港食品嘉年華做開幕主禮嘉賓，見佢周圍試食，一啲都冇高官擺款嘅味道。攤位係露天擺檔，高永文雖然行到一身汗，但就食到好開心，盡顯為食一面，從榴槤甘露、蛋糕仔到參茸海味湯，佢都冇放過、完全投入，直到發現成班記者等佢回答問題時，佢即刻嘴郁郁，似係擔心講嘢時牙齒唔雅觀。
高永文（右）同中華廠商聯合會會長施榮懷（中）等人試飲花膠蟲草花雞湯，高局長仲買咗兩包湯包添。
高永文好識做，一副食家口脗且食且讚，佢話平時都鍾意食榴槤，嗰款榴槤甘露味道淡淡哋，相信唔鍾意食榴槤人士都接受到；試飲一款花膠蟲草花雞湯時，就話味道好甜，即刻買番包蟲草花同猴頭菇湯包返屋企煲。講起入廚，仲話自己廚藝唔叻，但都叫識煮，點都好，佢入場行咗圈，啲參展商都受惠，事關高永文總共消費咗五百四十五元，大包細包戰利品，仲同職員齊齊合照添，認真唔話得。
