SUN搞作：少膽虫手記：壹隻垃圾game
淫賤黎成日向壹全霉職員灌輸︰「紙媒遲早死。」其實講到尾，都係想話畀大家知，《爛果》同《喪報》遲早做唔住，所以淫黎又開集屍會，宣布話要搞隻手機game，問吓編輯隻game應該走咩類型嘅路線。
少膽虫本能之下就衝口一句︰「波！」淫黎左手一摑，少膽虫右邊臉硬吃一巴︰「搞game都要灑鹽花，點過到淫審？」少膽虫雙手掩面，輕道︰「腦細，踢波又有咩鹽花？」只見淫黎一臉尷尬︰「我一路都講緊踢波，出汗蒸發咗咪有鹽囉……好喇，就搞踢波game！」
隻game搞咗無幾日，肥豪就氣喘喘衝入淫黎間房︰「腦細，隻game個server爆咗！」少膽虫即搶說︰「我一早話踢波game有得搞，多人玩到爆server！」淫黎一聽，仰天大笑。「唔係，係玩家狂send投訴信鬧我哋，搞到個server頂唔順！」肥豪續說。
「無可能，我哋隻game成日送嘢畀玩家，應該多謝都嚟唔切，點會鬧我哋？」淫黎一面狐疑。「弊在啲玩家話我哋專送垃圾，狂鬧壹全霉係垃圾，搞咗壹隻垃圾game出嚟！」肥豪道。只見淫黎怒目面向少膽虫，睇嚟少膽虫又要去睇醫生……
