亞勢備份軟件擬以配售形式喺創業板上市，公司行政總裁莊小霈講起自己個洋名「Schubert」嘅由來，佢話主要係阿爸（亦即是公司主席）莊景帆配合佢個中文名「小霈」個音嚟改。

尋日一聽Schubert個名，諗起奧地利嗰位舒伯特，至於面前呢位Schubert，原來都鍾意音樂，又識彈結他，覺得個名幾啱佢。

講講吓，Schubert突然好緊張話「死嘞，我冇喺招股書度披露自己鍾意音樂(o架)！」即刻望住公關求救，好彩公關話應該冇問題嘅，個人興趣同公司業務無關。佢話監管機構捉得嚴，真係唔敢提招股書上冇寫嘅嘢。

至於Schubert細佬，亦即係副主席莊小靈，佢洋名「Scherring」同樣一啲都唔普通，都係阿爸配合中文名個音嚟改。莊主席為兩位公子取名咁有心思，佢自己個洋名就只係直譯「Chong King Fan」！

第一手消息請下載on.cc東網iPhone/iPad/Android/Windows Phone Apps