政壇：日銀待客之道 窩心取勝
唔少日本商人旅居香港，有日本銀行仲特登嚟香港設立財富管理中心。日資行Nippon Wealth Limited來港兩年，終於拎齊證券同有限制銀行牌照，財管業務下周一就全面投入服務。尋日場記者會，佢哋CEO中島努先生只係輕輕舉咗一個例子，就講出咗香港日本有幾唔同。
Nippon Wealth下周一正式開張，當日咁啱亦係CEO中島努先生（中）嘅生日。
日本銀行同香港銀行又有乜唔同？除咗銀行職員大部分來自日本外，就係傳說中嘅日式待客之道。好似中島先生主持記者會，首先就同傳媒朋友鞠躬打招呼嘞！
中島先生話呢啲正正係日本嘅待客之道，好似去到日本嘅7仔便利店，店員必定會講你好、多謝同鞠躬；至於香港嘅7仔呢，好多時只得一種聲，就係八達通畀錢嘅「嘟」嗰聲，所以佢本人堅持要銀行維持日式優質服務，以窩心取勝。
何止係待客文化，就連啲客本身都分別好大。尋日同場仲有康宏嘅資產管理CEO吳家煒，聽佢講，日本客雖然慢熱，但就好清楚自己嘅投資需要，又會做足功課，唔會好似香港客一埋嚟就要求「低風險但高回報」。
