政壇：泛民建制擘面 委會全面開戰

卿姐不滿建制「評頭品足」

話說建制派前日舉行會議，釋放善意話唔會霸晒所有委員會正副主席，會讓出福利同衞生事務委員會兩個主席予泛民。泛民尋日開會後，泛民會議召集人何秀蘭表明唔會接受相關建議。佢話希望建制派尊重傳統，按兩大陣營議席嘅比例分配主席。現時泛民喺議會中佔三分一議席，理應喺掌財權嘅工務、人事同財委會中，至少有一個主席位，若只得福利同衞生兩委員會主席，泛民嘅主席人數就被壓到不足一成，咁做無異於趕盡殺絕。

唔單止咁，泛民更決定派白鴿黨黨魁劉慧卿（卿姐）競逐財委會主席，畀建制派彈票做內委會副主席（內副）嘅白鴿黨「單雞」單仲偕，亦會爭取內會主席。若果二人角逐主席失敗，會再選相關委員會副主席，至於其他委員會人選就未作出決定。劉慧卿預計泛民一個主席都未能選到，但希望社會能見到建制派嘅猙獰面目。佢又批評建制派對泛民候選人篩選係具侮辱性，不滿建制對候選人「評頭品足」。

葉國謙回應稱，既然雙方對主席人選無共識，惟有公平競爭正、副主席，仲話全面競爭係必然嘅事，但佢強調建制派仍希望同泛民溝通，希望泛民能夠擔任「兩正三副」，當中包括內會副主席。葉亦指出，三年前已清楚向泛民表達，對內副一職要有表達意見空間，否認篩選係侮辱泛民喎。