政壇：葉劉攞長者卡慳到盡
喺八月底滿六十五歲嘅立法會議員兼行政會議成員葉劉淑儀，尋日下晝冒住雨都要走去灣仔修頓中心社會福利署申請長者卡，攞到後難掩興奮表情，仲即刻走去附近嘅灣仔港鐵站買長者八達通添！咁急買長者八達通，原來佢尋晚要入到東涌咁遠，今朝又準備由東涌去九龍塘又一城食早餐，依家有張新八達通，兩程咁遠嘅車資都只係兩蚊雞，真係慳到盡！
葉劉淑儀（右一）排隊買長者八達通。
倡優惠涵蓋醫療
葉劉細數長者卡嘅優惠，認為兩蚊乘車優惠同長者戲飛優惠最實用，事關假日佢通常都會搭港鐵同埋睇吓戲。不過，佢覺得長者卡嘅優惠應該涵蓋埋醫療，例如牙醫同體檢等優惠，讓基層長者一卡傍身就搞掂晒。
雖然攞埋長者卡，但葉劉心態仍然好後生。佢話細個時覺得六十幾歲已經好老，依家就覺得年齡唔係問題，如果健康保持得好、體力好，現代人個個都等如真實年齡減十歲。佢自言仍然覺得好有活力，今年體檢各樣指標好好，希望可以繼續服務市民，做多啲嘢喎。
