話說財爺「鬍鬚曾」曾俊華做財爺愈做愈過癮。外界仲一度傳出佢可能有機會喺下屆特首選舉中陪跑。佢又好勤力做「鍵盤戰士」寫網誌，似係鋪路進行形象工程。但近日佢嘅有意「減辣」言論，可以話係自己搬石仔砸自己腳，唔止畀特首CY梁振英三度反駁，更令政圈懷疑佢係想討好地產商。不過，市民對樓價高企怨氣沖天，鬍鬚曾仲講減辣，到時就算想陪跑，都冇民意支持喇！

CY政府上任之後，為咗穩定不斷飆升嘅樓價，推出咗壓抑樓價嘅「雙辣招」，無奈樓價愈升愈有。正當近排樓價開始見到下跌趨勢時，鬍鬚曾突然話因為外圍環境波動及本港樓宇供應增加等因素，樓價可能會有所調整，政府會特別留意發展，仲揚言有需要嘅話，會考慮喺政策上作調整咁話。佢嘅言論一出，就令外界聯想到政府係唔係會開始「減辣」。而CY之後就喺出席行政會議時澄清，三度強調政府唔會「減辣」，可以話係狠狠咁摑咗鬍鬚曾一巴。

憂做咗地產商隻棋

其實喺握手事件之後，政圈一直有傳鬍鬚曾可能一七年有上位機會，可躋身下屆特首選舉當中。而鬍鬚曾唔止頻頻更新社交網站，上載睇拳賽、睇波以及同年輕人、小朋友合照等照片「呃like」，疑似進行形象工程外，亦都多次喺佢嘅網誌度落力宣傳「一帶一路」，一副配合國家發展嘅模樣。鬍鬚曾嘅舉動難免令人覺得佢正積極謀求上位，不過當鬍鬚曾搶閘講「減辣」，聞說佢陪跑機會立即幻滅，點解？傳聞話北京擔心佢做咗地產商隻棋。

依家樓價高企，小市民置業艱難，政府喺解決房屋問題方面又苦無寸進。鬍鬚曾依家仲話要「減辣」，豈不是等同與廣大上車無望、捱緊貴租嘅市民對着幹？佢亂講減辣，係將石頭搬嚟砸自己隻腳呀！

第一手消息請下載on.cc東網iPhone/iPad/Android/Windows Phone Apps