郊野公園亂晒龍 行山如入垃圾崗

唔係誇張，記者去過大嶼山鳳凰徑第三段睇過，沿途見到唔少垃圾，石上及草叢布滿膠樽、廁紙及膠袋，其中一塊巨石周圍，仲有一陣濃烈嘅臭味添，呢種大自然風味，簡直令人避而遠之喇。

好嘞，以為辛辛苦苦捱到觀賞日出嘅鳳凰山頂就有淨土啦，點知一樣咁得人驚，唔止石縫布滿食剩嘅零食，仲見到有遊人即場示範亂丟果皮，搞到山頂勝地淪為垃圾勝地，認真大殺風景，走都走唔切啦，仲有乜心情觀日吖。

正所謂，一污俱污，另外一條馬鞍山郊遊徑，情況亦唔好得幾多。涼亭周圍污糟邋遢，有行山發燒友講開，話朝早上山時已經見到有一大袋垃圾，估唔到回程落山時仍然原封不動，如果再放多幾年無人理，變垃圾化石都似。

你可能會問，乜郊野公園冇垃圾桶咩？原來漁農自然護理署上個月推行「自己垃圾自己帶走」計劃，喺全港多個行山徑減少垃圾桶數量，話要鼓勵郊遊人士自行清理垃圾，減低清潔工人嘅負擔喎。

冇錯，呢個計劃無疑用心良苦，亦係一場公德心及公民意識嘅測試。正如有攀山專家話齋，外國嘅郊野公園都甚少見到垃圾桶，地方唔單止唔污糟，反而異常乾淨，呢啲咪就係靠遊人嘅自律同埋慣性囉。問題係橘越淮而為枳，外國行得通，唔代表香港行得通o架。

事實勝於雄辯，近年唔少港人嘲笑內地旅客各種不文明行為，連雞毛蒜皮小事都拍片上網，口誅筆伐，點知原來係五十步笑一百步，家陣搞到郊野公園垃圾為患，可見唔少香港人一樣冇公德心嘅咋。如果大家真係當「香港是我家」，又點會自我糟蹋吖。

話分兩頭，市民缺乏公德心固然唔抵爭，港府搞環保一味講多過做，亦要打五十大板。好似漁護署推行「自己垃圾自己帶走」計劃咁吖，出發點係好嘅，可惜宣傳教育嚴重不足，亦甚少見有派員執法及清理垃圾，如果唔係有熱心義工自發上山執垃圾，垃圾山高過珠穆朗瑪峰都唔奇呀。

計太一叮話齋，郊野公園變垃圾崗，皆因當局無能，如果掃走晒垃圾官僚，話唔定香港可以人見人愛吖，叮！