政壇：佔中錯手語香港變麵包

佔領行動日前喺金鐘舉行集會，為咗方便聾啞人士理解，大會特登搵工作人員示範做出「愛與和平佔領香港」嘅手語，點知有讀者好眼利，話睇新聞片段發現工作人員做錯咗將代表「香港」嘅手語，錯誤做咗「麵包」，加上動作嘅偏差，最終手語變成「愛與和平固定麵包」。我哋請教身兼手語翻譯員嘅龍耳創辦人邵日贊，佢話當晚嘅手語示範的確錯咗。

邵日贊解釋，代表「香港」嘅手語係將手指聚集一齊形成O字，放喺嘴前面，手指向外彈開兩次。代表「麵包」嘅動作就啱啱相反，係手指張開放喺嘴前面，再向內收緊兩次，就好似揸緊鬆軟嘅物件咁。佢又話，意指「佔領」嘅手語動作都有偏差，做錯咗代表「固定」嘅動作。

據佢了解，當晚喺台上示範嘅係司儀，而非手語翻譯員，臨急臨忙要用腦袋配合手勢學手語，係要相當時間消化，搞錯咗都情有可原嘅。