政壇：搞搞政：官員公僕喜舊政總上班
金鐘添馬艦嘅政府總部外被佔領，公務員一度連工都返唔到，政府啟動應變計劃，包括部分高官、特別係主管財金部門嘅官員都「轉場」，去番位於中環舊政府總部即中區政府合署西座辦公。近日，金鐘平靜番，啲官員同公務員亦都陸續返回政總返工，不過，有「移師」咗舊政總返工嘅官員就話，中環冇乜受佔領影響，環境清靜，連食晏都方便啲，反而唔想返金鐘政總呀。
設計圖片及對白
見唔到示威免眼冤
據了解，財政司司長辦公室、財經事務及庫務局局長陳家強，同其他與金融經濟相關嘅部門就將「陣地」移師到中環舊政總辦公。唔好以為呢批返咗舊政總返工嘅政府中人會唔開心，事實係有人「樂而忘返」，尤其舊政總家吓應有盡有，起碼車到門口，又得幾個部門喺度辦公，地方寬敞啲，冇口號喧嘩，更唔使出門就見佔領者添。亦有人話，佢哋離開政總，可謂山高皇帝遠，做打工仔一定like啦。
另一批冇煩惱嘅就係上環海港政府大樓嘅政府新聞處人員，當初新聞處中人仲埋怨辦公地方離金鐘太遠，做起嘢上嚟唔係咁方便，依家獨處一角，就算金鐘政總被圍堵，新聞發布都唔受影響，真係錯有錯着喇。
