潮語「GD5GD」就咁睇起上嚟，好似同一啲經濟數據或者係GDP有關，但同好多潮語一樣，「GD5GD」係同啲英文數字完全無關！如果你唔識廣東話，更加唔使旨意可以解釋呢個類似數學參數嘅潮語。「GD5GD」嘅真正意思其實就係「知啲唔知啲」，用英文字母去拼音嘅話就變成咗「GD5GD」！

喬治．歐威爾的經典作品《1984》裏面有句名言「無知即力量」。睇香港今時今日嘅環境，真係貼切到不得了。每次見到「薑蓉」同「私煙」帶住一班無知大叔大嬸，宣揚愛港理念並到處踩場，就知道無知嘅力量有幾可怕。無知與良知其實都唔係咁難分，無知者因為無知，加上不去努力了解真相，好容易就被一些似是而非嘅觀念洗腦，喺真相面前自然拗唔過人，理屈詞窮之下只有發爛渣，甚至訴諸暴力。相反，有良知嘅人因為理直氣壯，自然處處展現出人格光輝。就看「雨傘運動」中，完全將兩種人分開起嚟。反佔領人士嘅無知同粗暴，質素之低，有目共睹。佔領者自發的善良、守秩序、無私奉獻，處處都係良心嘅表現，贏得全世界嘅掌聲。不過，今次雨傘運動嘅對手，係地上最邪惡嘅勢力之一。造謠、造假誤導係佢哋嘅看家本領，同一張相喺西方人眼中係浪漫，但喺中國人眼中就係誨淫。尤其係一啲「GD5GD」嘅人，最易受騙！

因為智能手機、電腦同即時文字通訊系統嘅普及，依家啲後生仔係習慣打短訊多過直接對話，而即時文字溝通又要求打字要快，所以就發展出好似「GD5GD」呢類潮語。好似「知、之」就變成「G」，「唔好」就變成「5好」，黃之鋒都會變咗做黃G鋒，「師兄」就被打成「C兄」，男性嘅私處一律以「J」去代表。上咗年紀嘅人，收到年輕人嘅訊息，真係會睇到一頭霧水。無知一族都唔能夠怪晒佢哋，因為佢哋好多都係嚟自基層，每日為生存拚搏，真係冇心情理會世事，又或者因為教育程度低，好多嘢未必理解。最討厭就係，一啲「GD5GD」嘅人，不斷說三道四，斷章取義，呢啲人嘅言論，才令人作嘔！

第一手消息請下載on.cc東網iPhone/iPad/Android/Windows Phone Apps