設計圖片及對白
日前颱風「海鷗」旋風式飛越香港，仲吹冧鴨脷洲洪聖古廟門前其中一支被奉為「定海神針」嘅二十呎龍柱，古廟廟祝有感龍柱慢慢倒地，似有神靈接住。不過，洪聖古廟一向係漁民祀奉海神「洪聖」嘅神聖之地，適逢東方報業集團日前引述權威消息，指政府有意削減特首選舉提名委員會漁農界選委，唔通「定海神針」倒塌，係預言漁農界部分選委即將「係咁先」？
問立法會漁農界代表「高佬賢」何俊賢有乜高見？但出身漁農世家嘅佢對呢座洪聖古廟似乎所知不多，以為兩支龍柱只係昔日建廟嘅支撐柱躉。「定海神針」龍柱突然倒塌，係咪預示漁農界六十個選委中，有十至二十個選委要喺下屆退位呢？佢堅決唔認命，反指削減選委數目嘅消息震怒咗洪聖爺，先令龍柱倒塌發出警示喎！
目前選舉委員會由一千二百人組成，但漁農界選委佔六十席，仲多過商界、工業界，而漁農界選民，實際上只係得一百五十九人。對於有人以漁農業所佔本地生產總值（GDP）較低為由，要求削減選委數目，高佬賢就反駁，漁農界係唯一代表第一級生產行業嘅界別，議席亦只係佔選委會百分之五，一啲都唔過分。相反，同樣擁有六十席嘅宗教界GDP係零，社會福利界更加係負GDP，呢條數又點計呢？削減咗漁農界選委係咪加畀高GDP嘅金融界呢？
高佬賢重申，要確保香港柴米油鹽穩定，漁農界就要有足夠代表喺選委會發聲，而選委會分為四大界別，就係要體現均衡參與喎！
第一手消息請下載on.cc東網
