城中鏡：巴菲特重口味灑鹽如落雪
每年巴郡股東大會，都會見到巴菲特又食雪糕，又飲汽水嘅貪吃模樣，但原來佢嘅飲食習慣仲有不為人知嘅一面。富國銀行向來係巴菲特愛股，富國行政總裁斯通普夫日前出席活動時，就透露兩人第一次飯局嘅情況，大爆巴菲特原來好「重口味」。
巴菲特成日食雪條、雪糕，但就畀斯通普夫踢爆佢原來食得好鹹。（資料圖片）
斯通普夫話當日巴菲特點咗份T骨牛排、芝士雞肉、薯蓉，當然唔少得佢最喜愛嘅櫻桃口味可樂，當食物送上枱嘅時候，巴菲特竟雙手拿起鹽罐，左右開弓狂灑鹽花。斯通普夫形容情況就好似落雪咁誇張。
曾做手術切除結腸息肉
睇見巴菲特咁食法，斯通普夫都忍唔住告誡對方應減少攝取鈉質，同時建議對方考慮進行結腸鏡檢查，以保障健康。事實上，巴菲特二○○○年時喺例行檢查中發現結腸息肉，並進行手術切除。
巴菲特仲講笑咁表示：「我入醫院嗰時仲有colon（結腸，又解冒號），出院時就變成咗semicolon（分號）了」。
其實巴菲特今年都成八十四歲，為咗延年益壽，希望佢喺飲食方面多加注意啦。
