政壇：建制極速玩謝許智峯
白鴿黨「乳鴿」、中西區區議員許智峯上兩個月大鬧區議會，堅持要求討論解放軍駐港部隊喺大廈外牆設置「中國人民解放軍」七個簡體大字「閃動」維港一事，同建制派炒大鑊，連會都開唔成。該區區議會文化康樂及社會事務委員會尋日再開會，委員會主席陳捷貴會前講明一定畀許智峯發言，但許智峯最後反被建制派議員極速玩謝兼否決議程，正式終止呢場鬧劇。
建制派議員極速否決許智峯提出嘅動議。（資料圖片）
許智峯話解放軍嘅燈飾令唔少港人「感到一國兩制名存實亡」，令市民深感不安。建仔張國鈞就寸爆話，市民嘅憂慮同燈飾風馬牛不相及，解放軍嘅燈飾「唔通打『紅十字會』標誌咩！」幾位建制派議員你一言我一語，每人幾分鐘就極速投票表決，最後委員會傾咗二十分鐘都冇，就以大比數否決動議。難得許智峯今次罕有好豁達，自言只係為市民表態，唔會為解放軍燈飾搞佔領喎。
