城中鏡：微博出Phone頭王思聰遭圍插
iPhone 6今日正式開賣，如之前透過iReserve搶到機，今日就可以去蘋果公司門市攞機。不過，早幾日已經傳出有水貨機流入香港，前日仲傳有內地人喺先達用每部三萬蚊高價掃咗幾部iPhone 6 Plus，尋日中國首富、萬達集團主席王健林個仔王思聰就喺微博上面大晒iPhone 6 Plus，同早前喺先達賣出嘅係同一款，唔通中國首富個仔都來港掃iPhone？
王思聰喺微博大晒iPhone 6 Plus。（互聯網圖片）
iPhone 6 Plus（互聯網圖片）
網上流傳話先達廣場入面已有幾間手機舖話有行貨iPhone 6搶先發售，但貨源不明。而先達G-World Mobile負責人「Lo哥」劉志剛早兩日就收到兩部用嚟畀工程師做測試，俗稱「工程機」嘅iPhone 6 Plus即時畀內地人以每部三萬蚊買走，但就唔想多講貨源來自邊度啦。
向來出位嘅王思聰，尋日就忽然喺微博貼咗好多張金色iPhone 6嘅相，從相片判斷，應該就係128GB iPhone 6 Plus，但貼完相之後就畀網民圍插話佢炫富，跟住佢就立即刪番啲相，刪剩一張iPhone背面相。但佢嘅微博定位就顯示咗，原來佢依家身處香港，網友就估佢專程嚟香港掃機。
