海濱長廊不堪吹 豆渣工程真丟架

話說舊年至全面啟用嘅將軍澳南海濱長廊，由於景色優美，加上就腳，好受街坊歡迎。點知原來得個睇字，日前颱風「海鷗」襲港，海濱長廊一吹即散，簡直不堪一擊。本報記者去現場睇過，發現多段欄杆倒塌，路面損毀，最誇張係有段近六米長嘅臨海石壆斷裂移位，欄杆倒塌扭曲，大幅地磚被吹走，好似經歷過大地震咁，令人慘不忍睹。

海濱長廊啟用一年就搞成咁，簡直匪夷所思，唔怪得被街坊譏為豆腐渣工程。正如有工程師話齋，海濱長廊設計時會預計可以應付十級颱風帶嚟嘅海浪，家陣八號風球都頂唔住，連石壆都吹到移位，可能同石壆大小、重量不足，又或者鋪設欠佳有關。嗱，唔理係設計有問題定係施工求其，唔該當局拿拿臨搞番掂佢，否則下次萬一唔好彩搞出人命，呢隻鑊你哋孭唔起。

老實講，海濱長廊甩甩漏漏，又點止石壆移位咁簡單吖。除咗單車徑危機四伏，滿布炒車陷阱外，北橋早前更被指疑似嚴重移位，連接橋墩一帶嘅行人路更有下沉迹象。有地區人士警告，長廊附近有好多地盤，當中涉及好多地基工程，打樁嘅震盪分分鐘影響成個長廊嘅結構，後果可大可小。照咁睇嚟，當局有必要為海濱長廊嚟一次全面體檢喎。

話時話，本港基建問題多多，質素每況愈下，將軍澳南海濱長廊只係冰山一角咋。好似耗資八十億元興建嘅啟德郵輪碼頭咁吖，同樣烏龍百出，早前一場黑雨過後，碼頭即時變身「水世界」，要出動沙包、水桶陣「抗洪」，工人甚至要着雨靴返工，簡直貽笑國際。仲有高鐵工程，延誤及超支都算喇，最怕港府繼續唔監唔管，放任自流，如果因為趕工而淪為另一個豆腐渣工程，咁就大件事喇。

正所謂，唔怕唔識貨，最怕貨比貨。同樣係大型基建，港英時代坐言起行，話做就做，唔止高效率，而且品質有保證。例如紅磡海底隧道，通車超過四十年，到依家仲係冇穿冇爛。相反回歸後嘅大型基建，唔係拖拖拉拉，就係甩皮甩骨，唔係延誤，就係超支，連最簡單嘅海濱長廊都淪為不堪一擊嘅豆腐渣工程，唔通香港真係大勢已去？叮！