政壇：政總飯堂 貪曾不屑幫襯
政府總部由中環搬去金鐘添馬艦後，連帶一班公務員都感到「搵食」艱難，所以政府總部飯堂就成為佢哋嘅醫肚之地。飯堂將於下星期結業，本來商舖開業結業好平常，但係我哋細問之下，先知道東主經營三年以來有成肚氣，老闆李先生仲諗番起「貪曾」前特首曾蔭權爵士在任以來都未去過幫襯，「證明特首有幾關顧伙記啦！」
設計圖片及對白
政總由一一年開始入伙，連帶飯堂同期開張。李先生話當時佢哋係開荒牛，點知好景不常，年底就發現政總連同立法會爆發退伍軍人症，時任教育局局長嘅孫明揚都中招。李先生慨嘆，當時生意足足跌咗一半，曾經諗過摺埋退出，但最後都決定繼續留低，至今蝕錢金額都幾「可觀」。去到今年中再入標，本月初產業署以「價高者得」通知佢唔中標，據知由經營多間警署飯堂嘅公司接手。
東主諷「咁特別嘅特首」
李先生諗起退伍軍人症生意唔好時，曾寫過大字報控訴，點知貪曾喺門口望咗一望就走咗，至落任前都冇去過幫襯，諷刺貪曾係「咁特別嘅特首」。相反財爺鬍鬚曾事後就帶隊撐場。
班公務員到下星期五就要暫別飯堂約一個月，李先生會將當日營業額與員工分享，笑言今個月係有史以來生意最好嘅一個月。佢又喺飯堂張貼通知，叫食客簽名鼓勵嘉許員工，教育局局長吳克儉、律政司政務專員卓永興、特首副官劉志堂都有份簽名，而財爺同特首辦主任邱騰華今個星期都有訂餐添！
李先生坦言，產業署月初通知下星期就要搬走，覺得時間太短，又認為自己做得唔差。佢話署方冇理由只以價高者得決定，因為標書都話有其他因素。產業署話接納咗最高價嘅標書，因為一般員工飯堂招標都係以價格為標準喎！
