城中鏡：「驗腦」吳得掂
被批評「外訪大過天」嘅教育局局長「吳得掂」吳克儉，尋日難得喺科學園「着陸」，同港科院院長徐立之出席學生博覽會。期間兩人到一間中學嘅展覽攤位，有學生介紹自行研發可分析腦電波數據嘅手機應用程式（App）。現場有人要求吳得掂試戴，點知佢大笑話：「我暈咗點算？」
吳克儉（前中）點都唔肯戴帽測試腦電波，被徐立之（前右）嘲笑。
吳克儉透過模擬盒子賞櫻。
徐立之自爆中文默書經常唔合格。
徐立之嘲「憂腦死」
徐立之聞言笑稱，若發現吳得掂「個腦死緊咁點算呢？」唔通佢擔心個App會洩露吳得掂嘅病歷私隱？
話說個App只要配合帽同耳夾偵測器，即可分析用家暈眩、興奮同癲癇等七大精神狀態，減低長期病患或長者發生意外嘅機會。呢個創新意念先被吳得掂拒絕試用，後遭徐立之挫銳氣，因徐發現做簡介嘅學生腦電波冇「緊張」信號，揶揄學生唔緊張即係部機唔掂喎。
兩人對中學生咁「絕情」，但對港大學生嘅虛擬現實模擬盒子就表現得好有興趣，吳得掂仲即場試睇盒子內嘅「櫻花」。唔通學生知佢掛住東京，專誠畀佢虛擬賞櫻？對於港大部分學生今日會商討將罷課升級，吳得掂認為同學真係要諗一諗，事關天氣涼咗好多，身體健康亦都重要，希望學生唔好因罷課受影響。唔知學生聽到吳得掂嘅「溫馨提示」，會唔會感到好窩心而讓步呢？
徐立之分享學習經驗時，就自爆從小記性唔好兼易分心，所以中學時中文背默經常唔合格，但就唔影響佢後來嘅發展，仲寄語大家咪死背書喎。
