政壇：建制派病到七彩
尋日立法會繼續審議《二○一四年版權（修訂）條例草案》，唔知係因為呢個星期泛民已拉咗兩日布，搞到建制派過度疲勞，定係因為氣溫驟降，唔少議員都不約而同病倒，有人因為感冒菌影響腸胃、嘔到七彩，有人就肚痛。就連立會主席曾鈺成都病到返唔到立會主持大會。有份拉布嘅議員「大舊」陳偉業就話，建制派個個病晒，部分仲年過七旬都要罰坐，搞到佢都過意唔去。如果大舊真係過意唔去嘅話，停止拉布就最實際喇！
立法會尋日復會，但就唔見曾鈺成蹤影，原來佢早已通知咗立會秘書處，因為身體不適，返唔到立會主持會議，所以秘書處就叫咗內務委員會主席梁君彥暫代大會主席職務。咁啱得咁蹺，同曾鈺成分屬黨友嘅議員「樹根」鍾樹根亦「嘔到七彩」，同樣冇現身立會。樹根日前喺立會係咁食黨友「象哥」黃定光嘅貴價陳皮，有人見到佢連啲陳皮跌咗落地都執番嚟食，唔通呢個就係佢腸胃不適嘅原因？
泛民賴焗住互傳染
樹根就話其實佢係患咗重感冒，而感冒菌又影響咗腸胃，所以先搞到係咁嘔喎。樹根尋日中午睇完醫生後，下晝就返立會開會，聲稱要帶病作戰。而同佢一樣似乎腸胃唔多好嘅仲有行政會議成員兼立會議員葉劉淑儀。葉劉都話尋日唔知點解肚痛，但搽咗白花油就冇事嘞！
至於泛民方面，議員胡志偉都眼紅紅作感冒，但佢就拒絕食藥，仲話唔好咁後生就開始依賴藥物，要信自己有抵抗力。有病唔食藥，真係教壞細路。而同樣作病嘅教育界議員葉建源就話立會太多人病，成日「焗」住喺度好易傳染。其實泛民因為拉布，都冇喺會議廳開會，又點會傳染呢？真係賴得就賴喇！
