政壇：港大生罷課 橫額寫錯字
港大學生罷課行動進入第三日，由於頭兩日參與罷課活動嘅學生少之又少，罷課委員會決定變陣，尋日喺港大百周年校園近鄭裕彤教學樓嘅「香港大學」招牌上，蓋上黑底白字嘅簡體字「香港市第一人民大學」巨型橫額，一來諷刺港大管治愈嚟愈大陸化，二來希望藉此吸引多啲同學注意佢哋嘅行動。
罷課學生懸掛嘅橫額寫錯咗個「第」字。
不過，可能因為天氣凍加濕度高，掛橫額活動因「油漆未乾」而延遲咗成粒鐘先進行，正式開始掛時又遇上橫風橫雨，加上班學生姐手姐腳，最後搞咗足足三粒鐘先掛得成。
最失禮嘅係班學生居然連個「第」字都寫錯。據聞罷委會今日會開會討論將行動升級，揚言會畀絕食更激，大家拭目以待喇！
