政壇：謝小華傳接掌民政總署
出任民政事務總署署長長達十二年嘅陳甘美華，本月初起開始退休前休假，但政府未同時公布接任人選。近日我哋收到風，政府屬意調任食物及衞生局副秘書長（衞生）Janice謝小華坐正，二月初上任，睇嚟政府都係想延續搵女性擔任署長一職，貪親和力大啩！
據聞政府屬意由謝小華（上圖）接替陳甘美華（下圖）任民政事務總署署長。 （資料圖片）
睇番Janice背景，佢係港大社會科學學士同倫敦大學法學士，八八年入政府，○五年起擔任副秘書長，曾任前經濟發展及勞工局、運輸及房屋局，依家主理醫管局事宜，都係時候夠鐘升職。有政府中人話，Janice為人勤力，屬實幹型，唔介意落立法會游說議員支持政策，好似早前政府貸款畀中大興建醫院，佢就主動游說白鴿黨支持。
據聞Janice亦係愛好打扮之人，有醫生話見佢次次都唔同打扮，幾養眼喎。新一屆區議會啱啱上任，Janice首要工作，就係要同十八區區議會打好交道，同埋盡快處理一億元社區重點項目呢個爛攤子喇！
