立法會議員蔣麗芸喺前日嘅立法會會議上，公然站立拉筋做運動，成為一時「佳話」。到尋日又輪到佢黨友Ben陳恒鑌表演。昨早立法會尚未流會時，記者影到阿Ben喺會議廳自己座位位置站立，首先將左右手以「十」字方式打叉拉筋，然後向上拱手，再將雙手縮回右方腰部，之後又一邊撐開雙手，一邊大力呼氣，最後更耍咗一個太極圈，與漫畫中嘅「龜波氣功」極為相似。

十字拉筋

撐手呼氣

耍太極圈

阿Ben事後否認自己係「孫悟空」或「龜仙人」，強調自己耍嘅係太極功夫「八段錦」，而非「龜波氣功」。佢話由於平日要長時間留喺立法會開會，無時間跟師傅練習，只好趁泛民點人數拉布期間，將練功圖解上載到手機，以便隨時練習兼打發時間。佢大讚「八段錦」好有效，「耍完個人會好熱」。

第一手消息請下載on.cc東網iPhone/iPad/Android/Windows Phone Apps