政壇：田二少爭認劉江華「親戚」
民政事務局局長劉江華上任以來，頻頻出席大小活動，政黨出身嘅佢，最近亦忙於會見不同黨派，相信係想同各黨派打好關係。尋日有政黨嘅地區辦事處開幕，並邀請咗劉江華擔任主禮嘉賓，係佢上任後首次參加嘅辦事處開幕活動。主人家之一嘅新民黨立法會議員田北辰（田二少）致詞時，大爆同對方有「親戚」關係。事緣劉江華創立嘅公民力量於去年同新民黨結盟。咁都可以攀關係，田二少真係識打蛇隨棍上。
劉江華（中）出席甘文鋒（左）社區辦事處開幕，田北辰即認親戚。
劉江華見田二少咁畀面，隨即好識做向對方笠番頂高帽，話無論喺立法會定地區工作，新民黨都係良好合作夥伴，希望繼續保持呢個關係喎！
講番呢個辦事處，其實係為該黨社區發展主任甘文鋒而開。田二少話好多街坊投訴好難搵阿鋒，今次開辦事處係回應訴求，仲話阿鋒一星期七日都喺辦事處喎！阿鋒就話佢住喺九龍區，最初連元朗、屯門都分唔清，做地區工作由一張枱、一個易拉架開始，派傳單時候亦冇人肯接，好彩依家同街坊熟絡咗。
