立法會新界東直選議席將出缺,預料補選明年初舉行,呢個議席雖然只有半年任期,但泛民及建制派都蠢蠢欲動,無懼「雞肋」。據知,多位有意出選嘅人士都只當今次補選為練兵,小試牛刀,就連本屬新界西嘅離島委任區議員周浩鼎都有意跨區參選,但聽聞佢可能跨區嘅消息,惹來黨內新界東地區兄弟不滿,指佢遲來先參選,所以周浩鼎最終會否試水,都要深入研究。

慘成黨內「人球」

建制派內,依家已經傳出喺今屆立法會選舉落敗嘅沙田區議員龐愛蘭、西貢區議員「哪吒」方國珊有意試票,而建制大黨則除咗周浩鼎外,北區區議員陳勇同劉國勳都係出戰嘅傳聞人選之一,身兼黨副主席嘅陳勇向來都係「瞻前顧後」嘅核心人物,佢好大機會繼續擔任黨內「大腦」角色,可見將來都未必會參選。至於劉國勳,由於該黨兩名新界東代表陳克勤及葛珮帆下屆都會競逐連任,劉如參加補選,就很難不參選明年立法會選舉,情況相當尷尬,所以最終重任或落喺周浩鼎身上。

但周浩鼎屬於新界西離島支部,如果跨區出戰新界東補選,對黨內兄弟又有影響。周浩鼎雖然喺城壇闖出名堂,但就好似黨嘅「人球」咁,早前先傳佢會接替黃定光嘅立法會進出口界議席,近期又變陣,或轉戰立法會超級區議會議席,依家又傳補選都係佢,傳聞多多,但補選係單議席單票制嘅對決,按傳統一般對泛民候選人有利,建制派陪跑居多,邊個出戰真係要慢慢度。

第一手消息請下載on.cc東網iPhone/iPad/Android/Windows Phone Apps