政壇：莫乃光論盡創業辛酸
香港經濟可以騰飛，全賴上一輩港人勤奮捱苦、勇於創業，所以政府及商界都好鼓勵港人創業，延續上一輩嘅打拚精神。香港應用科技研究院推出創業學人計劃，為年輕科技創業家提供專業培訓、內地考察交流等，呢日邀請咗一班名人交流吓心得，點知身為嘉賓嘅資訊科技界立法會議員莫乃光（Charles）、應科院首席市場總監廖家俊等，講起自己嘅創業經歷，卻好似嚇人咁，皆因呢條創業大道實在唔易行，佢哋都係捱過好多辛酸至有今日。
應科院呢個學人計劃，仲有基本生活津貼提供畀參加者，等佢哋創業時無後顧之憂，可以向理想進發。三十歲已經創業嘅Charles就冇咁過癮，佢話，創業時獲得嘅資助好少，開始時真係好困難，佢當年開設咗一間互聯網供應商，運作時，試過要周圍撲水出糧畀伙記，又試過無錢交電話費，過千條電話線差啲被中止服務，真係窮到燶。
廖家俊當年難捱交通費
好彩當年電訊市場引入競爭，電訊公司為咗留客，而畀Charles延遲付款，先至捱過一關，難怪佢分享心得時，趁機大嘆有競爭係好事。經歷咗咁多難關，Charles盤生意最終賣咗盤，依家就全職做議員。佢好感嘆咁話，創業絕對辛苦過打工，事關責任好重大喎！
廖家俊都向大家講咗佢創業初期嘅瘀事，原來當年嘅佢，一樣連交通費都負擔唔起，好彩最後公司成功上市，所以佢希望透過學人計劃，幫有意創業嘅年輕人一把。在場仲有微軟香港同澳門總經理鄒作基，現為微軟一哥嘅佢話，創業真係唔容易，試過創業之苦嘅佢，最後發現都係打工輕鬆自在啲，所以，佢最終放棄咗自己盤生意。
創業計劃上個個都講創業之苦，會唔會嚇壞啲後生唔敢去創業？現場反應似乎唔多驚，呢班前輩分享佢哋嘅苦處，可能比起讓人陶醉喺幻想中好啲，多啲經驗，才可以多啲準備。
