政壇：搞搞政：術數師批中長毛遇大劫

楊師傅年頭講過馬年香港乃「一片火海比劫爭財之局面」，上半年政局處於困境，「有政府等於冇政府」，更批算政務司司長林鄭月娥農曆二月同九月大事不吉，剛巧佢喺二月因發表「一錘定音」言論惹來批評，搞到事後要澄清補鑊。至於議員方面，楊師傅年初批算「長毛」梁國雄流年不利，面臨兩大劫數，尤以上半年更差，要小心官非，不諱言「可能好大鑊」，搞搞震冇乜好結果。湊巧長毛因衝擊替補機制論壇而入獄近四星期，更罕有錯過七一遊行。

鍾樹根「口舌招尤」應驗

即使長毛刑滿出獄，但楊師傅批佢捱到九月都依然「傷官見官」，容易惹小人是非、官非，睇嚟長毛真係要謹言慎行。另外，楊師傅亦批算Ann蔣麗芸同鍾樹根馬年繼續「口舌招尤」。回顧上半年，樹根五月喺立會會議上，以「鍾式英語」狠批本身係老外嘅港鐵行政總裁韋達誠「尖明（dreaming） on your office（在辦公室發夢）」兼以「I don't think so 囉！」反駁韋達誠解釋。佢事後仲死撐毋須評論呢啲「雞毛鴨蒜」嘅事。

阿Ann就更加唔使講，就算只係坐郵輪遊埠，都可以撞啱「佔領郵輪」風波做「旅霸」；佢其後又喺社交網站質疑「六四」晚會人數報大數，連巴西隊喺世界盃敗陣，佢都要做「鍵盤戰士」抽水。楊師傅年初奉勸佢要特別注意農曆九月會因口舌招尤之事再受攻擊，睇嚟佢真係要聽立會主席曾鈺成嘅訓話：「少啲講無乜用嘅說話。」講到底，運程嘅嘢都係信則有、不信則無，大家無謂太認真。