設計圖片及對白
同幾年前相比，依家香港嘅政局可以話係有翻天覆地改變。以往撐政府嘅人士多數低調，但近年無數反對「佔領中環」嘅團體突然冒起，聲言佔中會癱瘓中環、影響經濟等。不過，本身喺中環返工多年，屬資深「中環人」嘅立法會會計界議員Kenneth梁繼昌，就發表作為中環人嘅心聲。佢話現時一個國際金融中心嘅最大危機，一定唔係來自佔中，而係核心價值日漸被蠶食，最明顯例子莫過於「貪湯」前廉政專員湯顯明嘅貪腐醜行，令香港廉潔公正形象一鋪清袋。
核心價值漸被蠶食
Kenneth尋日喺電台節目話，雖然港交所設於中環，但現時香港所有金融交易買賣等實際操作，其實全部靠網上雲端系統操作，就算網路系統有問題，都可以靠打電話，甚至用衞星電話落盤，基本上金融界人士唔使去中環，都可以做到買賣。而所有同金融有關嘅周邊行業例如會計師樓、律師樓、商業顧問公司，全部都可以遙距完成工作，換言之，根本佔中唔會構成乜嘢經濟損失，更加唔好話癱瘓喇！Kenneth覺得佔中翌日，中環最多好似七月二號朝早咁塞吓車，根本阻礙唔到啲人返工。
反而令Kenneth擔心，最損害中環作為國際金融中心形象，係近年香港嘅核心價值慢慢被蠶食，例如貪湯公然利用廉署資源送禮、飲飲食食、歎紅酒同茅台，可惜執法部門竟然懶理。Kenneth慨嘆，金融中心一旦捲入各種貪污腐敗行為，聲譽會嚴重受損，希望市民關注呢方面多啲喎！
第一手消息請下載on.cc東網
