科蘭化身動作巨星撐烏拉圭申辦世盃！今屆世盃畀蘇亞雷斯咬人影衰晒嘅烏拉圭，為宣傳申辦2030年世界盃扭盡六壬，早前搵嚟著名導演馬田沙斯治，連同索爆女歌手Natalia Oreiro同星級前鋒科蘭一齊拍咗輯科幻宣傳片造勢。科蘭喺片中「占士邦」上身化身國家特務，誓要保衞國家榮譽！

咬人王 蘇亞雷斯

首屆世盃由烏拉圭喺1930年主辦，適逢2030年係世盃100周年紀念，呢個南美國家當然想喺自己地頭再次舉辦呢項球壇盛事，佢哋仲搵埋阿根廷搞聯合主辦。為咗隆重其事，烏拉圭喺今屆世盃開始之前已經進行宣傳工作，搵嚟上屆南非世盃金球獎得主科蘭擔正拍片造勢。

2030百周年 拉攏阿根廷合辦

呢條宣傳片勁有荷里活Feel，故事講一個邪惡分子偷咗1950年烏拉圭隊長華利拿嘅世盃冠軍獎牌，令烏國上下一夜間忘記國家隊當年威水史，包括喺馬拉簡拿球場擊敗巴西奪冠嘅記憶。特務科蘭同Oreiro攜手合作搶番塊獎牌，力保呢段光榮歷史，科蘭喺片中仲有大量動作場面，將來掛靴做埋武打明星都仲得！

條片早前出街後反應熱烈，連埋預告吸引超過26萬人觀賞，導演馬田沙斯治喺接受訪問嗰陣，大讚科蘭好快入戲：「科蘭好快就明白套戲嘅概念。當佢扮演特務時即刻交到戲，同佢一齊拍嘢都幾好玩。」不過最重要嘅係，沙斯治希望段片可以令國民支持烏拉圭再次舉辦世界盃。