呢排立法會大樓被衝擊，議事廳內亦火爆連場，議會內外都好亂，就連每個禮拜喺維園開壇嘅《城市論壇》，近期亦幾乎次次都係初則口角、繼而動武，情況愈演愈烈，真係教壞細路。

蔡耀昌喺論壇發言嘅時候，囡囡就伏喺佢膊頭瞓覺。

雖然城市論壇變咗城市「亂」壇，但係前沙田區議員「九哥」蔡耀昌尋日竟然抱埋兩歲大嘅囡囡出席同發言。唔通佢唔驚混亂？九哥解釋，皆因星期日外傭放假，老婆又有嘢做，為免獨留兒童喺屋企，惟有帶埋囡囡出嚟，一方面了解吓社會發生乜事，順便玩吓，已經唔係首次咁做喇！

現場所見，九哥個囡囡喺論壇早段跟住人拍掌，九哥發言期間，囡囡就伏喺佢膊頭瞓覺，佢講笑話唔知係咪囡囡太攰，定係其他講者講得太悶，所以咁好瞓喎！

第一手消息請下載on.cc東網iPhone/iPad/Android/Windows Phone Apps