城中鏡：傷健共融藝聚雙城
現代人興趣多多，但好多時「周身刀冇張利」，相比東華三院共融藝術廊「愛不同藝術」培訓嘅一眾殘障人士，雖然身體某些部分能力有局限，但喺藝術方面就另有作為。正因佢哋能跳出常規思考模式嘅框框，佢哋作品都具備獨特風格並發人深省，更於亞洲當代藝術展中吸引唔少世界各地買家青睞。部分同學作品將於下月首次於洛杉磯華美博物館展出。東華三院主席Ivan施榮恆日前睇住同學創作時，都大嘆自愧不如。
施榮恆（後左）同華美博物館董事長阮桂銘（後右），非常欣賞藝術家姜偉佳（前左）及殘奧前乒乓球選手張加祥（前右）嘅畫作。
畫作送洛杉磯展覽
Ivan話唔係淨係畀支畫筆班殘障人士玩玩吓就算，而真係搵專業導師按佢哋嘅能力同限制，向佢哋提供正規藝術訓練及工作坊，由最初同學搓爛畫紙同發脾氣，到大家坐定定畫到唔肯停，成功發掘到多位在藝術方面非常有天分嘅同學，助佢哋建立自己嘅風格並發揮最大潛能。
計劃目前有十六名殘障同學，部分成員嘅畫作喺拍賣會同展覽中，備受唔知佢哋背景嘅買家讚賞，成交價高達過萬港元，潛質比不少藝術家高。嚟緊八月九日至十二月十四日，華美博物館更挑選咗佢哋三十幅畫作同十件陶瓷作品於洛杉磯展覽，一眾藝術家得知可出外參展，都努力訓練自己體能，希望減低出國時嘅體能負擔。
