城中鏡：品茶透心涼 王詩雅糕招
因為家族經營茶葉生意，所以中華廠商聯合會青委副主席Celia王詩雅首次創業都離不開茶。佢聯同三位80後少女創業，喺九龍工廠區開茶味雪糕店，將普洱、烏龍、桂花及功夫茶與雪糕融為一體，期望吸引年輕人細味品茶文化。
美味雪糕當前，廠商會一眾青委徐詠琳（左起）、劉子芸、林蘭詩、周雯玲、友人Iris同常董李慧芬試完一杯又一杯。
菁英會常務副主席盧金榮（後排右）一家四口試食茶味雪糕，嗒得好滋味。
王詩雅（左起）開雪糕店，爸爸王曼源、王媽媽、細妹Maggie同細佬王智誠齊幫手整甜品宴客。
尋日新店開張，廠商會一眾青委成員、會董及菁英會成員齊到賀。外面烈日當空，入到店內，各人第一時間柯打杯雪糕。主人家賀新店開張，雪糕任食，唔使一粒鐘，功夫茶味雪糕率先清倉。中國茶葉種類多不勝數，Celia話新口味仍在不斷研發中，多得爸爸王曼源無限量贊助茶葉，否則試茶都試到窮。
爸爸做「白老鼠」試味
講番創業，Celia今次用私己錢同友人合資十多萬元開店，為免捱貴租，選址七百多呎嘅工廈單位。為省卻聘請雪糕師傅人工，佢同拍檔年前專程走去台灣學整雪糕，又考察當地如何將茶入饌，返港後將屋企變成「實驗室」，不停問爸爸攞茶葉做實驗。
Celia坦言「蝦碌」無數，試過因計錯時間，打開雪糕機時噴到滿身是雪糕，亦試過溝出怪味。幸好王爸爸挺身做「白老鼠」試味，更傳授營商錦囊，教女兒唔好怕辛苦，凡事親力親為。
同場仲有經營港產陀飛輪嘅沈慧林，佢都逆市擴充，十月將喺尖沙咀開首間專門店。雖然零售吹淡風，但佢就認為香港鐘錶品牌相比歐洲大品牌定價較便宜，喺緊縮奢華風下，反而更利擴充。
