政壇：泛民猛拉布政府有着數
立法會財務委員會前日召開八小時特別會議，一口氣通過二十一項撥款申請，雖然仲有十八項撥款要留番十月復會後先至可以審議，但泛民主派「拉布」反而為政府通過重要議案帶來契機。由於泛民長時間「拉布」，令財委會積壓大量議程，當中包括一些重要項目，好似瑪麗醫院重建工程撥款申請。在政府堅拒調動議程下，泛民都唔敢「拉布」拉死有關撥款，擔心受到外界指摘，所以出現前日最後一次財委會「快速批核」通過撥款嘅畸形現象。
吳克儉
就以財委會上周審議撥款一億零五百三十萬元畀由吳克儉做局長嘅教育局設立資助計劃為例，呢個項目係資助學生去內地升讀大學，雖然呢項撥款有唔少爭議，例如會被人質疑教育局想送啲學生返內地讀書「洗腦」，或大搞兩地融合，但由於當時距離財委會結束唔夠三個鐘，議員們都唔敢問得太多，費事連累及拖慢之後嘅撥款申請，所以只係問咗個零鐘就投票通過撥款，令教育局可以順利「甩身」。
假如政府已洞悉泛民呢個「拉布」漏洞，日後亦可以將計就計，開頭任由議員「拉布」，到最後關頭呼籲議員們以大局為重，盡快通過撥款，礙於時間緊迫，議員唔敢提問，甚至最後官員連回應都慳番，都不失為一個解決「拉布」方法，但就扭曲晒整個審議程序。
