政壇：鬍鬚曾寸泛民係假母親

當時議員李卓人仲批評，如果政府死都唔肯調動議程，即係「假重視」民生議題，同《聖經》嘅所羅門故事中嘅「假母親」一樣，寧願自己個仔被殺害都唔肯放棄爭奪撫養權。

財爺鬍鬚曾尋日又做「鍵盤戰士」，透過網誌反駁話，其實財委會討論嘅都係民生議題，嚴格嚟講每項都係「母親的兒子」，所以泛民只肯保護自己喜愛嘅兒子，放棄一啲佢哋針對嘅兒子，暗寸泛民唔係「真母親」。

唔知鬍鬚曾係咪被人鬧「鍵盤戰士」鬧得多，尋日「宅男」放假，下晝三點走去電台開咪客串做音樂節目主持。

期間佢推介一首同示威有關嘅歌《For What It's Worth》，話呢首歌令佢諗起自己喺美國讀大學時，都係覺得自己相信嘅就係最正確，睇見社會有咩唔對路，都會義無反顧發聲。佢又話年輕人要珍惜熱誠，但亦都要諗下自己追求啲咩。

之後，佢就不停播埋啲老歌，話年輕時曾諗過以音樂維生，曾經組織樂隊賣唱中文「口水歌」，於是背熟晒歌神許冠傑嘅歌，又點播咗許冠傑嘅《夜半輕私語》。