專上教育玩卸膊 香港明天點會好

你冇睇錯，太一叮亦冇寫錯，的確係「辛辛學子」。呢，年年放榜，例牌有人歡喜有人愁，而且仲係少人歡喜多人愁嗰隻，事關大學學位僧多粥少，非常之咁搶手，搶位大軍尋尋覓覓頻頻撲撲，箇中辛苦法實在不足為外人道。

大家可能會話︰唔係喎，今年全港近八萬名考生當中，超過二萬六千人達到入讀大學嘅最低分數線，一方面考生人數有所減少，另一方面學位多咗，平均一點三人爭一個位，證明今年升讀大專嘅競爭冇以往咁激烈啦。

冇錯，呢條數表面上係幾靚，可惜好睇唔好食呢！即係咁，計算大專入學率除咗睇夠分嗰班之外，仲要計埋整體應考學生至啱數。係人都知，發達國家同地區嘅專上教育應該係「寬進嚴出」，簡單啲講，即係喺確保最多年輕人有受高等教育機會嘅同時，提升教育質素。好似美國咁呀，適齡學生接受專上教育嘅比率，早喺四十年前已經達到五成，依家差唔多人人可上大學，反觀香港，過去廿五年比率一直停留喺一成八左右，同好多第三世界國家差唔多，今年叫做好啲，都仲有六萬學生望大學校門興嘆，你話係咪羞家吖。

仲有樣嘢不可不知，喺約兩萬個大專學額中，政府資助學位原地踏步，近八千個屬於自資學位。呢啲自資學位學費最平都要六萬蚊一年，對基層家庭嚟講絕對係沉重嘅負擔。更關鍵嘅係，學位認受性同質素究竟係點，只有天曉得。事實上，由於擔心自資學位張沙紙不獲僱主認同，唔少考生退而求其次選讀其他實用課程，方便日後謀生。又難怪嘅，有頭髮冇人想做瘌痢，邊個年輕人唔想讀得成書出人頭地吖，之但係大拿拿拎幾十萬讀個學位返嚟，萬一最後畢業變失業，咁就喊都無謂喇。

所以話啫，講嚟講去都係港產官僚嘅責任。大家有眼見，自資學位近年如雨後春筍，愈開愈多，單係今年就比舊年增加近兩成，相反八大院校資助學位停滯不前，政府唔單止冇增加教育嘅投資，反而將個波大腳傳畀「私人機構」，可見咩知識型社會、大專普及化，統統都係大隻講，教育商品化至係真。

唉，成日話知識改變命運，升學係向上流動嘅階梯，現實卻係年輕人入大學比駱駝穿過針眼仲難，既冇前途，更冇錢途，唔係變廢青就係變憤青。年輕人愈來愈激，其實都係無能政府逼出嚟嘅咋，叮！