顏明秀（左）話暑假會畀媽媽顏吳餘英（右）同爸爸過二人世界。
由於馬季煞科抖暑在即，尋日喺沙田馬場見到一批城中名人，佢哋多數開始諗緊暑假出外旅遊充電，其中中華廠商聯合會青委副主席Candy顏明秀話打算去菲律賓潛水，而且佢過去潛水有耳仔受罪超痛嘅經驗，令佢更想考番個潛水教練牌傍身。
岑寶寶（左）趁轉工空檔期夥好友王詩雅齊齊入馬場。
侯志強話暑假怕人多唔會外遊，留番旅遊淡季先去。
有五年幾潛水經驗嘅Candy話，身邊嘅朋友都已經考晒潛水教練牌，佢自知身形細細粒相對輸蝕咗啲，但佢仲係想考教練牌，底因係幾年前喺浮羅交怡參加咗個潛水團，嗰時係首次潛水，當地教練幫佢戴咗潛水面罩後，就拉咗佢落十米深水底，後來先發現個面罩原來未戴好，搞到事後一對耳仔受罪超痛，前後三日聽唔到嘢。
顏明秀唔做電燈膽
Candy嘅媽媽顏吳餘英就計劃同老公顏培英過一個郵輪假期，Candy表明唔會阻雙親過二人世界，仲話上年已經同佢哋坐火車暢遊蒙古同俄羅斯等地。
廠商會另一青委副主席王詩雅就計劃喺兩星期後去澳洲探吓一班好友，雖然估計當地天氣大概只有六至七度，但好多澳洲人唔理天氣幾凍都會去滑水，佢哋一班朋友放假最鍾意帶埋啲小朋友，買定幾袋零食薯片去海邊野餐，睇人表演滑水；至於廠商會青委岑寶寶就趁轉工空檔，打算留港抖吓。
同場仲有正積極考慮參與新界東補選嘅上水鄉事委員會主席侯志強，佢話明知參選贏面唔係好大，只係心口掛個勇字去試票，最終會視乎鄉議局執委會嘅意願做最後決定。
第一手消息請下載on.cc東網
