昔日名牌變恥辱 國泰醜聞佗衰家

講到醜聞，近日國泰客機食水含菌量超標，搞到乘客冇啖好飲，就係例證嘞。咁都唔算，國泰明知食水有問題仲隱瞞，事後半個月先至將個案呈報，最慘係到依家污染源頭喺邊都仲搞唔清，你話係咪搵乘客健康較飛吖！「東方報業民意調查」結果顯示，四成三受訪者直指國泰欠交代，罔顧乘客健康；三成三認為應盡快交代事件。

話時話，國泰醜聞鑊鑊新鮮鑊鑊甘，點止食水含菌超標咁簡單。近年國泰航班延誤當食生菜，搞到乘客大失預算，備受困擾。更離譜嘅係，有人居然四日內三次遇上國泰延誤，唔媽媽聲至奇，又點可能繼續幫襯吖。

點解國泰服務質素大滑坡，醜聞一籮籮呢？主要原因係管理混亂，公司上下離心離德，服務質素點會好吖。呢，國泰工業行動幾乎年年不斷，早排國泰空服員工會不滿薪酬及福利待遇發起工業行動，啱啱因為資方全面跪低而告一段落，以為雨過天青喇，點不知機師工會又發起無限期按章工作，抗議編更安排，有排煩。城門失火，殃及池魚，勞資惡鬥沒完沒了，員工谷着把火，乘客無辜受累。

睇吓市民點睇吖，對於國泰近年因勞資糾紛屢爆工潮，四成五受訪者歸咎國泰管理不善，兩成一人認為工潮會影響服務質素；兩成二人認為係因為待遇差，打擊咗士氣。

始終都係嗰句，面係人哋畀，架係自己丟。曾幾何時，國泰係名牌企業，香港之光，更多次摘下全球最佳航空公司桂冠添。家陣因為管理亂龍，臭名遠播，咁就同全球最佳拜拜嘞，連香港形象都畀佢佗衰埋！對於國泰全球最佳航空排名由榜首跌至第三位，四成四受訪者認為反映監管不力，管理混亂；兩成四認為國泰競爭力下跌；兩成三認為管理營運模式過時。

國泰每況愈下，香港之光淪為香港之恥，真係冇眼睇。學似有立法會議員話齋，國泰服務質素已經敲響警鐘，唔為醜聞「止血」，排名恐怕跌跌不休。咪話太一叮唔提醒，昔日輝煌成歷史事小，航空安全事大，千祈咪爆大鑊吖，叮！