呢排立法會主席曾鈺成是非不斷，繼早前建制派WhatsApp群組訊息全面曝光，被揭喺政改表決期間向建制派「通水」兼「教路」，搞到佢要多次道歉平息事件，近日又被踢爆三年前其辦公室一度被竊聽，最近再被揭喺佔領行動期間發表涉及種族歧視言論。

設計圖片及對白

對於舊年出席港大私人活動，曾鈺成引述醫生同學講要搵非洲人到佔領區嘅言論，佢尋日接受傳媒訪問時稱，本身係冇歧視嘅意圖，即係言者無心，如有人感到被冒犯願意誠懇道歉，但當時無人即場提出異議。佢又提及當時活動係私人聚會，主持人已講明唔好錄音，唔明點解會有錄音曝光，因此覺得奇怪同詫異。

對於有指有人刻意發放黑材料，佢唔認同，但同時笑言自己有好多黑材料，其後再連消帶打提到，如果未來一、兩年參與選舉，佢可能會較為着緊，之不過反正日後退出政治舞台，故唔認為有人願意花時間收集佢嘅黑材料。當問及黑材料嘅具體內容，佢話邊會有人主動披露自己嘅黑材料。

再表明唔參選特首

佢又趁機再次表明心迹，冇意再參選立會、亦唔會參選一七年特首選舉，而卸任立會主席後，亦唔會出任港區全國人大代表或全國政協委員，未來只係想籌組智庫，研究五十年不變嘅承諾期滿後，香港「一國兩制」如何發展等，呼籲大家唔好一開始就掘定戰壕，定死自己嘅位置，因為咁就唔會再有溝通商量嘅空間，結果只會係一切維持現狀。

話時話，佢表明毫無戰意，仲揚言完全退出政治舞台，只會專心搞智庫，之不過過去一段時間針對佢嘅疑似黑材料好似未停過，莫非佢自行舉晒白旗都唔夠，未來仲要清心寡欲，先可以避過政治風眼？

第一手消息請下載on.cc東網iPhone/iPad/Android/Windows Phone Apps