政府上周初公布本財政年度第二季度賣地計劃，來自政府賣地、鐵路項目同市區重建局項目嘅住屋供應共五千一百伙，而政府主動賣地只得三幅，提供約一千六百五十伙，被質疑未來唔能夠維持私人房土地供應。

陳茂波

由於外界質疑政府主動賣地只有三幅，其他土地供應主要靠港鐵物業發展項目「湊數」，發展局局長「波波」陳茂波尋日寫網誌澄清，強調準備喺今季推出嘅西鐵元朗站項目，其實係屬政府擁有，推出時間完全由政府主導，同其他政府賣地分別唔大，港鐵只係項目代理人。

憂步高鐵工程後塵

話說回來，高鐵香港段都係由政府擁有，港鐵只係負責高鐵工程嘅管理人，但最後都係搞到一鑊粥，令運輸及房屋局局長張炳良孭晒鑊。元朗站項目會唔會搞到好似高鐵工程咁，大家拭目以待喇！

第一手消息請下載on.cc東網iPhone/iPad/Android/Windows Phone Apps