政壇：房署三朝巨頭同場講樓
三代房屋署高層同場合照，可遇不可求！新民黨主席葉劉淑儀喺社交網站上載圖片，見現任運輸及房屋局常任秘書長兼房屋署署長應耀康、兩名房屋署前副署長譚榮邦同鍾麗幗三人出席分享會講房屋政策。眾所周知，譚榮邦同鍾麗幗「前後腳」加入新民黨，令人關注應耀康日後會唔會跟從佢哋嘅路徑加入。葉劉話同應耀康識咗三十年，以前喺貿易署有交往，大家好熟，不過唔會吼住要對方入黨。
譚榮邦（左起）、應耀康同鍾麗幗三代房署正副署長難得合照。（互聯網圖片）
講番當日嘅分享會，應耀康喺會上話，樓價飆升同公共房屋供不應求等現象，唔係香港獨有，全球大城市都面對類似嘅問題。佢又話要解決房屋問題，冇其他捷徑，必須增加土地供應，要全社會同心協力，為咗達到目標而努力喎。
