美國國債上限問題，總算短期可以大步檻過，從美股近期表現，華爾街其實唔怕一萬，亦唔怕萬一，黨爭導致美國政府部門停頓在股市眼中，只不過小菜一碟，上周標普五百指數攀升至歷史新高，令上周四本來趁好消息調整的港股，最終忍唔住掉番轉頭炒上。

太陽日誌2013/10/21

綜合大行預測和黃業績（港元）

上周五恒指升245點，報23,340點，向23,512點的重要心理關口走近一步，由預託證券收市價估計，今日恒指有機會以23,400點樓上開出。回顧過去一個月，恒指僅得800多點波幅，愈接近重要心理關口，資金明顯由一線指數權重股，轉落非指數成分股、新股甚至三四線股身上炒作，但講到最襟炒的，始終係互聯網、手遊及濠賭股。

上周五，騰訊（00700）創過432元歷史高新，而美國上市的互聯網股份一樣炒到癲，新浪網、百度創超過兩年新高，基金趨之若鶩，今年股價已經翻兩番的搜尋引擎奇虎創上市新高，預期市盈率已經講緊73倍，開始好難用正常的角度去衡量抵唔抵買。

基金戀棧大市值股

基金經理對環球宏觀經濟前景，並非毫無保留，反之TMT及濠賭股等較不受經濟大氣候影響，聽過唔少基金經理口裏說貴，但一樣焗住跟上車。事實上，這類股份今日市值驚人，好似基金大球場騰訊及金沙中國（01928），前者市值逾7,991億元，比三大地產商長實（00001）、新地（00016）及恒地（00012）加起來仲要大過千億，金沙四間賭場市值已經講緊4,280億元，比通街分行的恒生銀行（00011）2,440億元還要高，市值及流通量夠大，形成基金唔擔心揸鑊鏟快炒慢食，最緊要落車夠快。

至於你話49倍市盈率的騰訊抵唔抵買？如果未來幾年，年年交到25%以上增長當然無問題，但這無人可以保證，且股市恒常定律，係估值愈高，市場對其業績差過預期的接受能力愈低，史提芬唔反對人跟風炒股，但買家一定要了解風險及懂得適時落車。

和黃（00013）擱置出售百佳，雖然摩通在內的大行，早前已經估百佳最終會選擇分拆上市，但消息仲係幾令人意外。不過百佳唔賣，唔等於資產重組的策略叫停。上星期五收市後，長實聯袂和黃宣布將上海陸家嘴商用物業，以約89.6億元出售，和黃從中錄得18.39億元的出售資產收益。

和黃業務跨越電訊、地產、零售、港口、基建以至能源等多個行業，但今時今日股市選擇眾多，業務愈係單一化，基金愈鍾意。既然複雜業務控股架構令資產長期折讓，把部分成熟項目分拆，通過投資股本化把應有價值浮現，是百利而無一害。再者，美國退市前積極降低槓桿，也減低未來升息的財政風險。今年恒指累積升3%，和黃升22%，隨着資產重組的策略陸續實現，相信短期將會繼續跑贏大市。