本港旅遊業發展蓬勃，但係市區酒店缺乏，所以今個星期五截標嘅中環紅棉路美利大廈，雖然係屬於保育活化酒店項目，有唔少發展限制，但劉Sir相信都無阻財團搶奪決心。好似百利保及富豪酒店已經話明項目定位清晰，一定入標；而遠東發展都表明現正「密切留意」，市場估值最高約42.26億元。

美利大廈活化酒店項目於本周五截標，范統表示，百利保及富豪酒店將會入標。（資料圖片）

范統

美利大廈資料

嚟緊星期五截標嘅美利大廈酒店活化項目，喺早年列入「保育中環」計劃，當時已經建議改裝做一幢提供約300間酒店房嘅文物酒店。劉Sir睇番出售章程資料，投得地皮嘅財團只可全幢改裝，其中唔少於七成樓面須用作客房。另外，天台可以加建約9,472方呎樓面建築物，但該部分樓面唔可以做酒店房間。

遠展英皇積極研究

不過，有財團就認為地盤只准改裝呢啲限制，對發展商而言更容易處理。身兼百利保及富豪酒店董事范統話，如果地盤無限制，創造空間固然大，但係今次呢幅地皮建築框架上有限制，反而定位同設計上會更清晰，所以集團一定會入標競投。至於遠展高級營業及市務總監方俊都話，佢哋有豐富營運酒店經驗，所以對美利大廈酒店項目有興趣，現正「密切留意」。至於英皇國際執行董事張炳強透露，集團正進行研究。

地段優越極具潛力

劉Sir老友高緯環球張翹楚認為，地盤發展上受到局限，要打造五星級酒店睇怕比較難，不過地皮始終位處港島區「地標」位置，極具發展潛力，估計每方呎樓面地價約莫1萬至1.3萬元。折合估值最高約42.26億元。

其實，唔少歷史悠久具保育價值建築物，為免長期空置都會活化做文物酒店，而且都幾「旺場」。好似舊年三月開幕嘅大澳文物酒店，就係由舊大澳警署活化而成，首年就錄得逾22萬人次到訪，房間平均入住率仲近九成。又好似賣地表入面嘅前灣仔警署暨灣仔已婚警察宿舍，用途係「酒店/商業/社區及文化」，按政府構思，灣仔警署須整幢保留活化。