蔣任宏今年八月離任，政府昨公開招聘。（資料圖片）
現任個人資料私隱專員蔣任宏將於八月三日離任，政府尋日公開招聘其繼任人，上個月佢哋先嚟咗個新任副私隱專員黃錦卿，年中又輪到專員換人，半年左近，私隱署第一、二把手都係新人上陣，呢個安排可算少見。
根據政府嘅要求，私隱專員申請人須具備最少十年公共行政等相關經驗，月薪為公務員首長級薪級第五點，即最高約二十萬九千元，下月四日截止申請。雖然聘文並未有列明學歷要求，只係話須具備良好教育水平、最少十年公共行政等相關經驗，有領導及管理具規模的公共或私營機構的經驗，具有法律背景更佳等，但另有一啲要求如申請人須具有清晰遠見、剛正不阿、具出色的領導才能、行政技巧及成熟品格等，就一啲都唔簡單。
根據《個人資料（私隱）條例》，私隱專員由行政長官委任，由行政會議員陳智思擔任主席嘅遴選委員會將負責向行政長官建議委任最適合人選。而現年六十四歲嘅蔣任宏，一○年獲委任為私隱專員，任期五年，但上任時即被指喺○五年任郵政署署長時，長沙灣郵政局發生針孔攝錄機偷拍員工醜聞，被指帶頭侵犯私隱，他其後澄清指自己對事件不知情，但當時身為郵政署署長，責無旁貸。
第一手消息請下載on.cc東網
