政壇：搞搞政：政改通過唔樂觀 林鄭譚志源民望插水

齊破任內新低點

政改第二階段諮詢開始後，林鄭同Raymond就經常行孖咇出席唔同政黨團體嘅政改研討會同論壇，曝光率肯定係眾官員之首，但曝光率高唔一定係好事，港大嘅民調就顯示，林鄭嘅民望由去年十月開始逐步下挫，最新民調顯示佢評分再跌零點六分，支持率淨值又跌兩個百分點，無論係評分定支持率淨值，都跌至佢做政務司司長以來嘅歷史新低點。

至於Raymond仲大鑊，支持率淨值暴跌十一個百分點，係眾官員中跌幅最大嘅一位，同時亦破咗佢自己嘅民望新低，佢直言「當然比較傷心」，亦理解市民對政改通過唔樂觀，所以將不滿同失望情緒投射到主理政改嘅官員身上。

三人組之中嘅袁國強較少就政改議題發言，民望反而不跌反升，再次印證官場中「少做少錯」嘅哀歌。不過，食物及衞生局局長高永文呢輪成日曝光講流感，支持率淨值反而升咗六個百分點喇，可見，民望插水與否實在視乎係邊個官。